探索號 Aful Explorer

Aful 成立於2018年，擁有豐富既自家技術，更有自家生產單元既能力。而今次同大家分享既Explorer 係集以往P系列同MagicOne 技術之大成而推出的高性價比產品。Explorer 用上RLC分頻技術，8mm生物震膜動圈做低，中同高都分別用上自家制超闊頻寬動鐵各一，但只係賣低過$1000，就咁睇spec就好似好抵！

訊源：Cayin N7，Sony Wm1am2

耳膠：Acoustune AET 07/08

測試歌曲：Ado 殘夢 “”，Top Gun:Maverick OST “Main Titles”，黃凱芹 給你留念 “給你留念”

聲音方面屬雜食型，高音清爽秀麗而柔順，低頻有打擊力，中頻唔會好似某啲耳機咁冇得好緊要，三頻平衡帶小小暖意。人聲有穿透力，企既位置中等，而音場唔算闊但個立體感有既。

配上 Effcet Audio Code 24

用上長期駐場既Code 24我以為會有大提升，結果比預期失望，佢係有質素上既提升，包括音場深度、低頻既層次、人聲既質地，但對比原裝線都係好左20-30%左右，比平時試既其他機較少進步。

配上 Effect Audio Code 23

同樣係都駐場既Code 23終於爭番啖氣😂同樣係提升質素但佢做比code 24更寧靜既背景而有更豐富既層次感，低頻多左一份力量感但中高細節毫無減弱。

配上 Labkable Hybrid Reference（換左古河4.4插）

反而呢條有驚喜，人聲稍微推返前小小，多左一份特別既感染力而不失原有既穿透力，整個分析力有可聞既提升，每件樂器既件頭都清晰左。而低頻重質不重量，線條都收緊返啲，中高部份都收滑左啲，所有進步都令到隻機更雜食。

總結

Aful Explorer 唔算難推，係N7用Low Gain已經有足夠空間發揮。然而Explorer 都有缺點例如對大編制歌曲既分析力，場面既表達等，但個人覺得佢已經發揮到超身價既表現，呢個價錢絕對值得留意。