千元內之單圈好選擇 水月雨Starfield 星野

Date: 4/3/2020

喺國產品牌入面,講單圈玩得出色,一定唔可以唔提水月雨呢個品牌。由KPE萌牙,到KXXS大受歡迎,經過千錘百鍊之下,終於推出個人認為暫時係品牌內CP值最高嘅一隻單圈耳機,水月雨Starfield 星野。


包裝

星野嘅包裝簡潔 內附原裝耳機收納盒及耳膠,不過我近期係好少用原裝附送嘅耳膠。多數時間會因為耳機嘅音色,再配合唔同私伙耳膠以作調音(之後會同大家介紹我嘅耳膠collection)。


耳機本體

”LESS IS MORE“,現今好多耳機都強調用上幾多單元,或者混合多種唔同單元組成,但往往平價嘅多單元耳機或者hybrid都出現聲音頻段銜接之問題,聽落感覺雖然搶耳但唔自然。所以小編我一直覺得單圈往往有一種魔力,可以吸引我去試去聽,CNT單圈就正正係星野吸引住我嘅原因。等陣係聽感部分再講。而外殼一改以前兩隻單圈用銀色面,改為低調嘅暗藍,都係其一大賣點。雖然變左藍色,但係外殼依然係金屬,比膠殼更堅固耐用,在聲音方面,金屬外殼不易帶來共振,在中高頻表現一般會比膠殼表現得亮麗。


耳機本體


內部結構 (圖來自官網)

聲音特性

(聲依家嘢就好個人嘅,每人感受唔同,用每部player同線材又會有唔同感受 ,建議師兄們帶自己嘅gear去試下佢就最準確,以下為小弟試完之後對星野嘅小小觀感,使用器材為 SONY ZX300,ZH1ES) 星野用上嘅CNT動圈令佢雖然令佢嘅瞬態同高頻延伸比KXXS同KEP比下去,但係我就反而更加鍾意佢相對柔和同鬆容嘅風格。係以前聽KXXS或者KEP嘅時候,雖然樂器表現好,但係有時會出現高頻“吉”耳同人聲會出現唔夠感情嘅狀況,而星野就無再相同嘅問題。用dap仔(zx300/xudoo X20)推星野個時候,佢已經交足功課,音場闊,三頻無出現斷層銜接度高,低頻下潛夠深並有力,聲音暖和,人聲表現有感情,佢樣樣都齊。雖然用上臺機“ZH1ES”時,音場會比用機仔推闊少少,低頻會潛得更低,更有力。一般而言,單動圈耳機一向音場較闊,三頻較少出現斷層,低頻下潛較深並有力,聲音較暖,人聲表現有感情,星野全部都齊!同時,單圈細緻度唔夠,分析力同分離度非頂級,大編制曲目表現較遜色嘅問題佢都有,係一隻相對傳統”動圈聲“嘅耳機。(反而KXXS處理大編制比佢好,DLC動圈嘅優點,但就係無左所謂嘅“動圈味”,音場會較窄,高頻會較緊,人聲會比較直白,低頻唔夠潛)。


總結

單圈耳機,你話佢係分析力高?佢唔係,佢比唔到動鐵嘅分析力你。你話佢好細緻?佢又唔係,佢都係俾唔到動鐵嘅細緻你。你話佢好smooth?佢都唔係,靜電單元D聲比佢smooth十萬九千倍。但玩單圈對我黎講,就正正係食正佢陣鬆容不逼,唔會出現頻段銜接問題,而相對柔和嘅模擬味。所以對我黎講,星野絕對係一隻完成度比KXXS更高嘅耳機。如果你只聽樂曲/大編制曲目,又想入對千元單圈玩下的話,sorry,星野應該唔係你杯茶。但係如果你聽流行曲多,鍾意暖暖地,想暖身少少,人聲有D感情,少聽大編制,又唔執著與”超高分析力/分離度“的話,千元內星野絕對係一個好選擇。玩單圈?”SIMPLE IS BEAUTY”。


規格 (圖來自官網)


後話

請多多支持28review同小弟所開設嘅耳機瘋 earphone addict。鍾意小弟嘅文章就可以比個like我個page,可以dm小弟或者whatapps小弟交流下,遇到有關配置嘅問題不妨可以問下小弟同,小弟一齊習思廣益,交流交流。今次評價到呢度,日後再有心水耳機選擇,到時再同大家分享。


購買或查詢:
淘寶網 或 28mart代購
Whatsapp: 6224 6228
(特別鳴謝廣告客戶提供及贊助耳機作為評測之用)

About 然仔

00後耳機愛好者 曾接受知名雜誌訪問, 主玩入耳式耳機 富有永恆初燒嘅精神 還請各位師兄關照下小弟 Freelance 專業耳機評測 Facebook 耳機瘋 版主 文章間中也會轉載到28Review上 earphoneaddict@gmail.com

發佈留言

發佈留言必須填寫的電子郵件地址不會公開。 必填欄位標示為 *