2.5mm?3.5mm?4.4mm? 淺談各種平衡線制式

Date: 7/4/2020

對於剛剛買左DAP既初燒朋友,通常都會比d朋友「毒」話要買翻條平衡耳機線,用來插落去DAP既平衡輸出,話聽歌會正好多。究竟乜野係平衡輸出? 2.5mm/3.5mm/4.4mm平衡接頭又係乜來? 好多時初燒都會一頭霧水,有見及此,今次我想針對初燒朋友去簡單地講解一下(本文不會講解太複雜的理論,務求10分鐘內比大家一個粗略既認識)。


乜野係單端輸出? 乜野係平衡輸出?

以前既DAP基本上只會有3.5mm插頭,亦即係所謂既單端輸出。但呢幾年,絕大部份既DAP除左配有一般3.5mm單端輸出外,都會加入平衡輸出,而常見既平衡插頭有2.5mm/3.5mm/4.4mm 三款。咁到底單端同平衡有乜分別? 三款常見既平衡插頭又有乜唔同呢?

如果單從外觀,一般單端插頭係2環3節,3個節點分別對應正極、負極同埋接地。而平衡插頭係3環4節,4個節點分別對應左聲道正極、右聲道正極,左聲道負極同埋右聲道負極。由於單端左右聲道係使用共同「接地」,所以會導致左右聲道訊號互相干擾,造成音染。但當使用平衡時,因為左右聲道都各自有自己既「接地」,所以就能避免左右聲道訊號互相干擾,從而提高左右聲道既分離度同信號既純凈度。

除左外觀,相對於單端設計,好多時平衡設計既線路每邊聲道都會有兩組相同既對稱零件,左右聲道加埋就會有四組零件,所以推力亦會比單端大。

簡單來講,平衡既聲音分離度同信噪比都比單端高,絕大部份情況下推力也會比單端大。


2環3節單端插頭


3環4節平衡插頭


各種常見的平衡線插頭 (2.5mm/3.5mm/4.4mm)



2.5mm 平衡線插頭


2.5mm平衡插頭



2.5mm 平衡插頭算係早期係DAP上出現既平衡插頭,早幾年AK/Pioneer/Onkyo出既DAP好多時都會有2.5mm輸出。佢主要有以下既優點同埋缺點:
優點: 尺寸細,比較適合用係DAP呢d比較細既隨身裝置。
缺點: 由於尺寸細,所以插頭同插座接觸面比較小,接點間既阻抗值亦會較高,從而影響音質。另外如果使用不當,係大量插拔之後好容易會產生鬆脫又或者接觸不良既問題。

基本上除左AK,而家已經比較少廠商會用2.5mm平衡插頭,多數會用4.4mm既平衡插頭。



4.4mm 平衡線插頭


4.4mm 平衡線插頭



4.4mm 平衡插頭係而家既主流格式,大部份新出既DAP都會配備4.4mm平衡輸出。佢主要有以下既優點同埋缺點:
優點: 尺寸大,所以插頭同插座接觸面比較大,接點間既阻抗值會較小,音質會較好,重有比較硬淨,無咁易斷。另外4.4mm插頭理論上係有第5極接點可以用來接地,可惜真正有用到呢個第5極既耳機線同DAP係極少,同埋係耳機線呢d短距離傳輸上面係唔係真係有效一直都無一個肯定既答案。
缺點: 尺寸大,所以DAP要預留比較多的位置比個插座,所以部DAP的尺寸唔可能做到好細部。



3.5mm 平衡線插頭


3.5mm 平衡線插頭



3.5mm 平衡插頭係比較冷門既格式,通常只會係部份國磚上面見到。佢主要有以下既優點同埋缺點:
優點: 尺寸介乎2.5mm同埋4.4mm之間,無2.5mm咁脆弱,阻抗值亦不會太高。由於佢尺寸同單端插頭係一樣,所以只要DAP上既單端接口加入適當設計,就可以係唔駛用轉接線既情況下用一條3.5mm平衡線同時兼容DAP上既平衡同埋單端接口。
缺點: 尺寸比4.4mm平衡細,所以阻抗值會比4.4mm高。


有關轉接線(將平衡線轉成單端線)

理論上可以透過轉接線將任何平衡線轉成單端線,原理就是將分開左右聲道既「接地」接成「共地」。但相反(將單端線轉接成平衡線)就不可行,因為不可能透過簡單既物理線材將「共地」分成左右聲道獨立既「接地」。

大部份人都會覺得經過轉接線會影響線材本身既聲音,即係話如果條線係平衡線經轉接線轉成單端線會同直接用單端頭唔同聲。咁其實有無好d 方法可以令到無影響呢? 答案係有既!!!就係用3.5mm平衡線材,只要DAP上既3.5mm單端接口的「接地」位夠長可以接觸曬3.5mm平衡第3同第4節 (也就是左右聲道既負極) ,咁就可以係唔經轉接線既情況下直接將平衡線插放單端位黎用。當然喇,呢個情況下平衡線自然會變成單端線,唔會有平衡線既效果。


到底邊款平衡係最好?

如果考慮硬淨同耐用,就絕對係4.4mm平衡。如果講音質,技術理論上都係4.4mm平衡,因為佢既阻抗值係最小。但如果想唔用轉接線同時支援單端同平衡,暫時就只有3.5mm平衡可以比到呢個方便你。

市面有d DAP係同時有2.5mm同埋4.4mm平衡輸出 (例如Fiio M11/Shanling M6) ,呢類DAP主要係想吸引一d已經有2.5mm平衡線既買家唔駛浪費之前買落既線,但當要買新既平衡線,其實都應該盡量考慮4.4mm而唔係2.5mm。


平衡一定好聲過單端?

平衡同單端有3個主要大分別,就是 1. 推力大 2. 容易做成高信噪比 3. 聲音分離度高。

先講推力,推力大好處就是可以推d 難推既耳機又或者耳牛,但如果本身隻耳機唔難推,單端既推力都足夠應付的話,咁其實用唔用平衡未必有好大分別。

然後就係高信噪比,平衡介面本身有長距離傳輸仍然有高信噪比既優點,所謂長距離好多時講緊係超過100米,而一般耳機線都係1米至3米左右,其實未必一定要用到平衡介面來做傳輸。咁點解有時有d廠商仍樂於係DAP上面加入平衡輸出,其中一個原因係可以係設計上偷懶,用提高成本加入平衡來輕易得到高信噪比既優點。事實上,如果產品線路設計優良,單端也可以做到好高既信噪比,唔駛話要用平衡先做到,所以有時有d DAP個平衡同單端有好大既分別,真相未必係佢個平衡做得特別好,反而係因為佢單端線路偷懶做得特別差。

聲音分離度高係平衡同單端一個好大既分別,初初聽平衡會覺得好「震撼」同「搶耳」,其中一個原因就係因為聲音分離度高左。不過有d人會覺得咁樣違背左HIFI高保真既原意,事關將分離度提高左就會同現場錄音有分別,違反左HIFI盡量還完錄音現場既意思。

簡單來講,如果DAP線路設計優良同埋耳機唔算難推既話,其實單端都可以好好聲。市場上亦都出現過好一些單端做得好出色既DAP,例如乾龍盛既QA361又或者Cayin N8,佢地既單端都做得非常出色,甚至比某d牌子既平衡重好聽。


總結

雖然呢篇文並無好深入既技術原理講解,但我都好希望大家睇完呢篇文,會對各款平衡插頭有個初步認識,亦唔會再迷信話平衡一定好聽過單端既講法,如果大家對呢個題目感興趣既話,網上有好多講得深入好多既文章,大家search 一下就可以找到。


溫馨提示

最後想係到賣個小廣告,就係所有係28Mart訂購既線材,除左一般常見既3.5mm單端插頭,文中所提及既三款平衡插頭(2.5mm/3.5mm/4.4mm) 其實都可以要求訂製。另外28Mart亦有出售轉接線,方便大家將平衡線轉成單端線,有興趣既話歡迎大家向28Mart查詢一下。

About 微笑的魚

可以hea的話,不會郁......

發佈留言

發佈留言必須填寫的電子郵件地址不會公開。 必填欄位標示為 *