驚喜萬分 五元兩絞線

前言

如果大家有留意開28 Mart的話，都知近排佢地出左好多條有特色既線，咁岩我入手左其中一條，就好自然要黎個開箱同大家分享下喇。

外觀

第一件事想講下個外觀，講樣既話條新線同五元線係非常之似，不過線芯就新線粗d，絞數相對少d(新線只有兩絞)，成份方面兩者都係合金線但廠方無透露用左邊幾款，有見及此，以下會用「五元兩絞線」去介紹呢條線。

聲音

黎到聲音部份，呢條線算係一條能夠提高「結象」既線，佢能夠強化聲音既線條感，令你聽得比平時更加清楚。但要留意既係，佢本質並唔係一條超高分析力既線材，所以可能有d人會覺得聲音既資訊量唔夠多 (如果鐘意高分析力線我會推介大家試下大水喉又或者石墨稀)。簡單黎講，呢條線係會令你聽「清楚」左，而唔係「聽多」左，線材取向的話聲音係偏爽快，人聲亦算清脆明亮，相對於純樂器歌曲，佢比較適合聽d節奏感強既流行曲，例如用佢黎聽Yoasobi既電音就非常之好。

配搭

耳機配搭方面，純鐵又或者平板都有相當唔錯既表現，簡單測試過Sgor Luna / Super 1 Plus / Super 2 Live都幾夾呢條線，但混合式多單元耳機 (即係圈+鐵+靜電)就未必隻隻都夾到，所以都係個句，試過覺得夾到自己隻耳機至入手就最穩陣。

總結

總括黎講，呢條線d聲唔算話超班地好，但佢係一係好好玩既線，只要夾岩耳機，絕對可以帶到d新驚喜比你。