28review
Dunu 本身係老牌子，之前出既耳機以中高階市場為主，so far口碑亦算幾好。難得既係幾年前佢出左隻Titan S，以佢牌子定價黎講絕對係史無前例地低，當時大家都曾經對Titan S有d期望，可惜最後市場反應都唔算話好受歡迎。事隔數年，Dunu 今次推出左 Titan S2，同樣主打入門市場，咁到底呢次Titan S2有無交足功課呢?就等我黎過初步評測喇。
*** 利申: 是次評測耳機由BSA借出，並非本人所持有 ***
配置
簡單講下耳機配置，Titan S2係一隻0.78 2 pins既動圈耳機，動圈單元係「內外雙磁雙腔體高性能動圈單元」，外殼亦都花左d心思，據稱呢次係用左鍍鉻全金屬腔體，我起初以為用左全金屬小就會有d重量，但結果佩戴感非常理想，呢到真係有d估唔到，好值得讚賞一下。另外標配既線材係單晶銅加單晶銅鍍銀混編，插頭採用左可換式設計 (3.5 + 4.4)，以標配既線材黎講算係合格有餘。
聽感
講配置的確好悶下，其實乜配置都好，都唔及講真實聽感好。測試Titan S2方面我就用左NiPO N2去評測，分別聽左一堆中英日韓既快慢歌。總括黎講，我覺得Titan S2係一隻偏中上盤既耳機，分析力係同價位中算好出色，佢尤其適合聽一d 節奏明快既歌曲，感覺速度爽快而且 聲場樂器線條撐到盡，但盡得黎又唔會話好誇張地放大，口型亦算清楚，唔會話樂器一多就變到成個車禍現場咁。人聲方面就覺得如果厚一點會更吸引，而家略嫌人聲唔夠「毒」，韻味唔夠深。當然喇，以上係原裝配置下既表現，聽落Titan S2我認同係有潛力既，相信比下心機夾下線應該可以有d小驚喜。
隱憂
上一代 Titan S有用家投訴外殼有甩漆既問題，甚至當時論壇上亦有人為左呢件事出現對罵既情況，我記得當時有用家提供過相片，證實甩漆問題係確確實實咁存在。呢次Titan S2用左鍍鉻全金屬外殼，希望唔會再有上一代既外殼問題就最好。
總結
Dunu Titan S2比上一代係有進步既，始終二代之間都相差幾年，正所謂一個人幾年之間都可以有好大既進步同改變(好食懶飛，遊手好閒者例外)，更何況耳機廠呢。總括黎講，我覺得Dunu Titan S2 係一隻主打中上盤既入門耳機，如果喜歡聽d 節奏感快既歌係可以考慮入手既。
