28review
今次同大家Review既係 Soundpeats Capsule 3 Pro+ TWS 藍牙耳機，入手既主要原因係想體驗一下用左xMEMS呢種新技術既藍牙係點樣，而市面上暫時有用到呢款技術又最平就係呢款型號，特別講一下呢個型號同早前出既 Soundpeats Capsule 3 Pro 係唔同既，留意番係有個「+」號係尾既，兩者價錢上都有點小差距，千祈唔好攪錯。
硬件介紹
Soundpeats Capsule 3 Pro+用左兩個發聲單元，其中一個就係傳統既動圈單元，不過尺寸都幾大，有成12mm。而另一個就係用左xMEMS單元架構既發聲單元，根據官方所講，傳統動圈負責低頻部份，而中高頻部份就交由xMEMS單元負責。
音源傳輸編碼方面就支援LDAC、AAC同SBC，就咁睇用Android機既話就著數d，因為近呢幾年出既Android基本上都支援LDAC，而用IPhone既話就意味住只能使用AAC傳輸編碼，但係唔係真係會有好大差距呢?咁就要得閒作進一步測試先至知道。
聲音部份
聲音的話我特別滿意佢既低頻部份，bass打得深得黎又充滿住彈跳感，簡單來講就係爽快既bass，低頻呢part比好多藍牙耳機都優勝得多。耳機中高頻部份由xMEMS單元負責，分析力同音場都比預期既好，就算聽d多樂器既音樂都唔會亂到好似車禍現場咁。另外如果講聲底的話，我就覺得呢隻耳機有d偏冷聲，中頻人聲底略微欠左少少感情，整體黎講聽人聲既話我覺得同價位既Edifier NeoBuds Pro 2會比SoundpeatsCapsule 3 Pro+好少少。
降噪/普通/通透模式
安裝左佢自家個PeatsAudio應用程式就可以打開ANC降噪模式，簡單測試過係有唔錯既效果，但我又覺得開左ANC之後聽歌無「普通」模式咁好，所以最後都係用番「普通」模式。另外特別一提佢重有個「通透」模式，係呢個模式下面可以聽到環境聲，我自己就覺得呢個「通透」模式十分適合係Office做野個時用(開左通透模式以後聽住歌就唔駛驚d同事叫你無反應)。
缺點
我覺得Soundpeats Capsule 3 Pro+最大缺點係無in ear detection (中文好似釋做自動耳朵偵測)，所以佢做唔到除耳機就識自動停音樂呢個功能，亦因為佢無相關既硬件感應器，所以呢個功能唔可能透過更新軟件去解決到。比較有趣既Soundpeats有d型號係有呢個功能，但剛好Soundpeats Capsule 3 Pro/Soundpeats Capsule 3 Pro+係無呢個硬件感應器，呢個就有d美中不足喇。
結論
想試下xMEMS呢種新單元我覺得都可以入手既，但如果係人聲控，我就反而會推介番Edifier NeoBuds Pro 2多d。
