林六萬第5代 (KAEI-DAP5)開箱

前言

一直都有興趣想買部林六萬做串流DAP，但之前個幾代林六萬個技術未夠成熟，難得呢代總算穩定，而且後巷代購個價錢好吸引，所以最後入手左呢部林六萬KAEI-DAP5(即係第5代)。既然入左手，就當然黎個簡單開箱分享下喇。



何謂林六萬

簡單來講林六萬係指一套手機加耳擴一體化既方案，每一代都由唔同既手機再加一體化耳擴所組成。我記得早期手機係用Sony手機，但較新的代數(第3、5代)就已經改用IPhone。我今次入手既係第5代林六萬，用既係IPhone SE2 再加用左ESS9039Pro既DAC耳擴組合。



好處

其實林六萬最大好處係貪佢個IOS流暢度同軟件支援度高，因為用左IOS，所以基本上所有串流App都會支援同埋亦都唔會Lag，亦都唔駛驚好係Android DAP咁過左一排D串流App因為更新左所以用唔到又或者勁慢。

尺寸同接口


林六萬第5代Size比樂彼部P6Pro長少少，大約有兩包紙巾咁上下長左右，可惜重量有點重，所以長期單手拿的話會有d攰。接口方面，除左3.5/4.4耳機接口，佢亦都有3.5/4.4既Line Out接口，同時亦有兩個Type C既USB接口用來充電、入歌同埋做USB DAC。




聲音

我入手呢部林六萬第5代用既DAC係ESS9039Pro，聲音表現較為中性，分析力強。同LP P6Pro比既話P6Pro人聲韻味重d，但林六萬聽日系快歌又好似好d，聽樂器例如鋼琴也是林六萬表現較好。



Src同串流

相對Android，IOS較容易解決src既問題，既然林六萬轉盤部份用既係IPhone，理所當然地佢都唔會有Src既問題。另外我都試過用佢播Tidal最高音質既歌，基本上同本地直接播Flac檔案分別唔太大 (要好細心AB先聽到兩者個分別)。



總結

不論聽File又或者串流，林六萬第5代表現都十分出色，因為轉盤用既係IPhone，所以穩定性同流暢度都係非常之高。要數缺點的話，就是機身有點重同發熱情況有點嚴重。不過總括而言，佢都係一部幾唔錯既DAP，如果有聽高質串流既需要，絕對可以考慮一下呢部林六萬第5代。

更換 / 安裝IPhone

以下示範一下點樣更換 / 安裝IPhone，簡簡單單3個步驟就可以了。

Step 1

用螺絲批(跟機連埋，唔駛特登另外買)將背後角位4粒螺絲扭開。



Step 2

打開正面既面蓋



Step 3



移除連接IPhone同DAP既lightning Cable，咁就可以完全將兩者分開。

題外話，如果本身有舊既IPhone(當然尺寸要合適喇)，就可以只買底座同面版自己安裝。咁一來價錢平d，二來又唔駛浪費左部舊IPhone，一舉兩得。另外要特別留意既係IPhone上面唔可以有玻璃貼，唔係會頂住安裝唔到。

正呀師兄，等見到你試玩呀

Jpwinson 發表於 2023-9-28 17:33
正呀師兄，等見到你試玩呀

好啊，無問題

師兄，乾龍盛 都滿足唔到你喇．又入新機？

誰明浪子心 發表於 2023-9-28 21:05
師兄，乾龍盛 都滿足唔到你喇．又入新機？

乾龍盛MUB1就玩藍牙同輕便，林六萬就玩IOS同新解碼，兩者有所不同，所以Why not both

我更新左點樣係林六萬上面安裝同拆除IPhone，有興趣可以望望

https://28review.com/forum.php?mod=redirect&goto=findpost&ptid=147&pid=2811&fromuid=39

leungleung1234 發表於 2023-9-28 15:37
更換 / 安裝IPhone

以下示範一下點樣更換 / 安裝IPhone，簡簡單單3個步驟就可以了。

試完師兄部小林已經覺得唔錯,依家仲要放埋點樣安裝啲圖上嚟等我又望下屋企部無用嘅SE2, 點算

Apple 變 Dap ，裝個框框就得，真係好方便。
我都有舊機啊，有得腍！
唔知個框 實唔實淨？

誰明浪子心 發表於 2023-10-2 00:33
Apple 變 Dap ，裝個框框就得，真係好方便。
我都有舊機啊，有得腍！
唔知個框 實唔實淨？ ...

個框係CNC鋁金屬外殼，夠曬硬淨。

我都到咗手，依家等老板條新線到就完美啦，之前用師兄部機加條新線玩人聲，樂器同包圍感都好出，快啲到就好啦

Jpwinson 發表於 2023-10-27 16:42
我都到咗手，依家等老板條新線到就完美啦，之前用師兄部機加條新線玩人聲，樂器同包圍感都好出，快啲到就好 ...

唔好意思有D離題,請問下新線係唔係包網既銅線?因為某"好"廠最近出咗限量線,我搵人幫我訂結果慢咗一步無晒,我最近都無去過門市唔知瘦佬出既係唔係同一款線基

cdromball 發表於 2023-10-27 17:53
唔好意思有D離題,請問下新線係唔係包網既銅線?因為某"好"廠最近出咗限量線,我搵人幫我訂結果慢咗一步無晒 ...

唔係，師兄最好落去試，有兩條最新嘅白色

Jpwinson 發表於 2023-10-27 18:16
唔係，師兄最好落去試，有兩條最新嘅白色

先多謝師兄回答,不過我目前比較想要既係純銅線,混編同合金線暫時唔係我目標

部機我有幸試左, 最大特點真係好靜,聽串流又順, 當然強行同聽檔案比, 係有小小分別, 如果師兄門手上有舊SE, 入部玩下都唔錯

Zingy 發表於 2023-10-27 18:55
部機我有幸試左, 最大特點真係好靜,聽串流又順, 當然強行同聽檔案比, 係有小小分別, 如果師兄門手上有舊SE, ...

無錯，呢部機算好靜下，有舊SE/SE2係手真係好值得考慮下

Jpwinson 發表於 2023-10-27 16:42
我都到咗手，依家等老板條新線到就完美啦，之前用師兄部機加條新線玩人聲，樂器同包圍感都好出，快啲到就好 ...

恭喜入手

林六萬只可以接駁apple的？android 駁轉插可以嗎？
P.S. 用過LG & Nokia, 非果粉

瘋酥快活人 發表於 2023-10-27 23:50
林六萬只可以接駁apple的？android 駁轉插可以嗎？
P.S. 用過LG & Nokia, 非果粉

android 駁轉插未試過, 不過都唔見意, 因為部機大細係用嚟比SE嘅, 其他機大細不一樣裝唔到入去就無意思 不過佢有type c頭可以插線用android機如果想玩9039pro嘅都可以作為耳擴用都抵,有晒3.5/4.4