心境-ASTELLA 阿斯特拉 簡單開箱＆聽感

大家好，對上一次發文已經係2023年嘅事。最近都無咩特別嘅耳機推出，加上最近又整咗對HD820玩下，搞到我都無咩心情玩入耳式。直至上星期尾，約左友人返咗大陸食嘢，順便睇下有咩耳機好玩。然後就俾我發現到一個無做香港市場嘅牌子 - 心境，一試左對ASTELLA之後就心知不妙啦。經過兩分半嘅掙扎，最後都係把持不住，以下為大家介紹 心境音頻科技嘅旗艦-ASTELLA。

=======================我是分隔線===========================

呢對耳機採用2靜電單元加10動鐵單元，詳細可以睇下官方嘅渲染圖。

阻抗19 Ω，靈敏度112db，令到呢隻耳機並不難驅動。即使推力細嘅DAC亦都可以一定程度驅動呢對耳機。 我自己就分別用P6Pro配A6Pro同埋DMP-Z1作為音訊源並驅動耳機。

ASTELLA配搭原廠線，擁有大，寬敞嘅音場(入耳式)。喺尚未足夠run-in嘅情況下，低頻嘅表現已經不錯。深入並且紮實，並沒有臃腫或者打鐵皮嘅感覺，呢一個表現只係由動鐵單元所展示出嚟，而嗰兩粒靜電單元只係負責高頻。喺處理人聲方便就表現得十分之有韻味，帶有毒性不過清澈，並不模糊。跟住就要講吓佢最出色嘅中高頻，中高頻嘅分析力好高，亦都去得好盡但冇失控，做出嚟個感覺就好華麗。亦都因為高分析力再加音場唔細嘅情況下，聽落去感覺就係十分舒適，而且在廣闊嘅音場下填補到細節，唔會有空虛或者空泛嘅感覺。尤其是喺Sony嘅調音加持下，佢表現出嚟嘅中高頻更加華麗，更具細節，令人有種置身殿堂嘅感覺。

咁啱得咁蹺手上又有相似取向嘅奧丁，就可以同場較量一下。喺兩者都係原裝線嘅情況下，我認為奧丁已經把持唔住，面對ASTELLA音色表現有啲失色，加上奧丁對player嘅要求會更高以及一手售價更高，令人好難唔選擇新一代嘅耳機。原本諗住退燒入耳上枱玩耳牛，睇嚟又有排都未換到我部枱擴。

=======================我是分隔線=========================

今次國產嘅耳機機的確帶嚟唔少驚喜，喺保持一定CP值嘅情況下，亦可以挑戰舊日旗艦。呢樣嘢係我之前未預計過嘅，雖然今次呢對耳機價錢亦都唔低，但就令我十分期待未來國産市場各工作坊嘅出品。

$15xxx

上星期個大陸食野耳機團的確唔錯，玩左成日真係正，下次我覺得可以搵多幾間耳機店去體驗下。


講番隻ASTELLA，不論心境呢個牌子又或者ASTELLA呢隻型號之前都從來未聽過，不過都唔太緊要，耳機最重要始終都係聲音表現，講聲既話我覺得佢可以比到一種好華麗既感覺，佢有好強既分析力去，會將d歌折解得好清楚然後再放大比番你，然後又因為佢有靜電單元，所以個高頻延伸靚得來又唔會話刺耳。不過有時優點亦同時係缺點，始終有d人會覺得呢種聲音太過「分析」，比得太多既時候反而少左種韻味。

咁我都認同佢絕對有大牌子旗艦既級數，以聲論價黎講絕對得係對得住個價錢有餘，奈何佢牌子真係唔夠大牌，2手市埸應該都無乜，所以要入手都需要幾大決心下。

leungleung1234 發表於 2024-3-31 11:01
上星期個大陸食野耳機團的確唔錯，玩左成日真係正，下次我覺得可以搵多幾間耳機店去體驗下。

近排再上去試多一次已經煲好咗嘅嗰對，人哋嗰對個高頻更加順滑，毛刺咁更少，低頻潛入得更深更有層次感。呢對耳機真係有問鼎大牌子旗艦級嘅實力，希望我對都可以快啲修練完成，但係靜電單元唔可以廿四小時工作，距離出關仲有一段好長嘅時間

眼鏡Andy 發表於 2024-4-2 11:21
近排再上去試多一次已經煲好咗嘅嗰對，人哋嗰對個高頻更加順滑，毛刺咁更少，低頻潛入得更深更有層次感。 ...

我覺得有靜電的話就唔好一次煲太長時間，一次最多煲4個鐘就要停下會安心d。